രൂപയൂടെ മൂല്യം ഡോളറിനെതിരെ ഇടിഞ്ഞു. വ്യാപാരത്തിന്റെ തുടക്കത്തില്‍ 20 പൈസയുടെ നഷ്ടത്തോടെ 86.36ലേക്കാണ് രൂപയൂടെ മൂല്യം താഴ്ന്നത്. നാലുപൈസയുടെ നഷ്ടത്തോടെയാണ് രൂപ വെള്ളിയാഴ്ച വ്യാപാരം അവസാനിപ്പിച്ചത്. ഡോളര്‍ ശക്തമായി തിരിച്ചുവരുന്നത് രൂപയുടെ മൂല്യത്തെ ഇനിയും ബാധിച്ചേക്കാമെന്ന് വിദഗ്ധര്‍ മുന്നറിയിപ്പ് നല്‍കി. ഇന്ത്യ പ്രധാനമായും ആശ്രയിക്കുന്ന ബ്രെന്‍ഡ് ക്രൂഡിന്റെ വില ബാരലിന് 70 ഡോളറിനോട് അടുപ്പിച്ചാണ്.
വിദേശ വിപണിയില്‍ അമേരിക്കന്‍ ഡോളര്‍ ശക്തിയാര്‍ജിക്കുന്നതും ഇന്ത്യന്‍ ഓഹരി വിപണിയില്‍ നിന്നുള്ള പ്രതികൂല സൂചനകളുമാണ് രൂപയുടെ മൂല്യത്തെ ബാധിച്ചത്. നിലവില്‍ വിപണിയുടെ മുഴുവന്‍ കണ്ണുകളും ഇന്ത്യ- അമേരിക്ക വ്യാപാര കരാറുമായി ബന്ധപ്പെട്ട ചര്‍ച്ചകളിലാണ്. ഇതിന്റെ ഫലം എന്തുതന്നെയായാലും അത് രൂപയുടെ മൂല്യത്തെ അടക്കം സ്വാധീനിക്കുമെന്നാണ് വിദഗ്ധരുടെ അഭിപ്രായം.
അതേസമയം, തുടക്കത്തില്‍ നഷ്ടം രേഖപ്പെടുത്തിയ ഓഹരി വിപണി ശക്തമായി തിരിച്ചുവരുന്നു. ഒരു ഘട്ടത്തില്‍ സെന്‍സെക്സ് 500 പോയിന്റ് വരെ ഉയര്‍ന്നു. നിഫ്റ്റി 25000 എന്ന സൈക്കോളജിക്കല്‍ ലെവലിനും മുകളിലാണ്. ഐസിഐസിഐ ബാങ്ക്, എച്ച്ഡിഎഫ്സി ബാങ്ക്, അള്‍ട്രാ ടെക് ഓഹരികളാണ് പ്രധാനമായി നേട്ടം ഉണ്ടാക്കുന്നത്.
Content Highlights: rupee falls 20 paise against us dollar in early trade